Maalinta Haweenka oo siweyn looga xusay qaybo katirsan magaalada Muqdisho
MudugNet, Muqdisho, Axad, 7da Maarso, 2010.
Munaasabad si weyn loo soo qaban qaabiyey ayaa kadhacday xarunta madaxtooyada ee Vill Somalia, iyadoona munaasabadda ay ka qeyb galeen mas'uuliyiin katirsan dowladda Federaalka KMG ah ee Somalia.
Munaasabadda oo intii ay socotay badankeed looga hadlay marxaladda ay ku sugan yihiin haweenka Soomaaliyeed ayaa lagu soo bandhigay heeso iyo riwaayado ka turjumaya marxaladda ay ku nool yihiin haweenka Soomaaliyeed.
C/raxmaan Xaaji Aadan Ibbi oo ah wasiirka Kaluumaysiga iyo Kheyraadka badda ahna R/wasaare ku xigeenka koowaad oo ka hadlay munaasabadda ayaa sheegay in dowladda KMG ah ay tix galin weyn siinayso haweenka.
"Dowladda KMG ah tix galin gaar ah ayey siinaysaa haweenka Soomaaliyeed, iyadoo og daruufta ay ku nool yihiin" ayuu yiri C/raxmaan Ibbi wasiirka Kaluumaysiga iyo Kheyraadka badda dowladda KMG ah.
Guddoomiyaha Maamulka gobolka Banaadir Eng Nuune oo ka hadlay goobta ayaa isna sheegay in maamulkiisa uu il gaar ah ku eegayo xaaladda ay ku nool yihiin haweenka Soomaaliyeed, isagoona sheegay inay shaqooyin u furi doonaan qaar kamid ah haweenka Soomaaliyeed.
