Guddi Samafal Maxali ah oo Maanta looga dhawaaqay Magaalada Muqdisho
MudugNet, Muqdisho, Arbaco, 3da Feberaayo, 2010.
Guddi u istaagi doona samata bixinta shacabka Soomaaliyeed ee ku dhaqan Duleedka magaalada ayaa maanta looga dhawaaqay magaalada Muqdisho xilli ay dhibaatooyin haystaan Barakacayaasha.
Kadib Markii ay Hay'adaha Samafalka ay Biya dhaamintii ka joojyeen Dadka ku Barakacay Ceelasha Biyaha,Carbiska iyo Lafoole ayay Culimaa'udiin Soomaaliyeed bilaabeen in ay u qayla dhaamiyaan shacabka dhibaataysan.
Gudi isku dhaf oo isugu jira Culimaa’udiin iyo ganacsato ayaa isu taagay sidii ay wax uga qaban lahaayeen xaalada dhibka badan oo ay ku suganyihiin dadka ku barakacay inta u dhaxeysa Muqdsho iyo afgooye oo xaalad biya la’aan ah ay soo food saartay.
Dhibaatada ugu badan ee dadkan heysato ayaa ah biya la’aan kadib markii Hey’adihii booyadaha biyaha ku siin jiray dadka barakacayaasha ah ay dhoween joojiyaan howshaasi.
Gudigan isu xilqaamay wax u qabashada dadka barakacaayasha ah oo ka kooban ganacsato iyo Culimaa’udiin ayaa ka soo uruurin doona ganacsatada Somaliyeed lacago lagu caawinayo dadka ku dhibaateysan inta u dhaxeyso Muqdisho iyo Afgooye.
Gudoomiyaha gudigan Sheekh C/fitaax Awees Abuu Xamza ayaa sheegay in howshooda ay si dhaqsi ah ku bilaabi doonaan islamarkaana la gar gaari doono dadka dhibaatada ay heysato.
Dhismaha gudigan ayaa ku soo beegmay xilli baahi dhinaca biyaha ay ka taagantahay deegaanada ku yaala duleedka Magaalada Muqdisho.
Waa Markii ugu horaysay oo ay Dadka Somali ah sheegaan in ay Buuxinayaan Boosaskii ay baneeyeen hay'adaha Samafalka oo intooda badan ka baxay Koonfurta Somalia gaar ahaan meelaha ay maamulaan Kooxaha Islaamiyiinta ah.
Mudugnet.com Xafiiska Wararka Magaalada Muqdisho
