Muqdisho, Isniin, 30ka August, 2010.
Madaxweynaha G/mudug oo sheegay in guul iyo is afgarad ku soo dhamaaday booqashadii uu ku tagay dhulka ismaamulka Soomaalida Ethiopia.
Madaxweynaha Galmudug State Cornel maxamed Axmed caalin oo dib ugu soo labtay maanta magaalada G/kacyo ee xarunta Gobolka Mudug ka dib booqosho qaadatay 3 isbuuc uu ku tagay Dhulka ismaamulka Soomaalida Ethiopia ayaa sheegay in wada hadaladii iyo Kulamadii uu la soo yeeshay madaxda Dowladda Ethiopia ay ku soo dhamaadeen Guul iyo Is Afgarad.
Cornel Caalin ayaa sheegay in wahadalada dhexmaray madaxda Galmudug iyo maamulka Soomalida Ethiopia ku saabsanaa iskaashiga dhinaca Amaanka labada dhinaca iyo sidii la isaga kaashan lahaa xoojinta xiriirka iyo Amniga.
"Guul iyo Is afgard wanaagsan ayuu ku soo dhamaday booqoshadii aanu ku tagnay dhulka ismamulka Soomaalida Ethiopia ayuu yiri Cornel Caalin.
Safarka madaxweyanaha Galmudug uu ku tagay dhulka ismamulka Ethiopia waxaa ku wehliyay qaar ka tirsan wasiiradda maamulka iyo saraakiisha Ciidamadda, iyadoo safarkana uu yahay kii ugu horeeyay madax ka socota maamulka Galmudug ay ku tagaan dhulka ismaamulka soomaalida Ethiopia tan iyo markii mamulkasi looga dhawaaqay gobolada dhexe ee dalka soomaaliya.
Dhinaca kale madaxweyanaha G/mudug State ayaa sheegay in maanka G/mudug ka jira uu yahay Mid la isku halayn karo marka laga reebo waxyabo yar yar oo falal amaan dari ah ka dhaca magaalada.
Mr Caalin ayaa ku edeeyay falalka amaan darida ah ee ka dhaca magaalada G/kacyo maamulka Puntland ee waqooyiga magaalada oo ka gabiyay iskaashi dhinaca amaank ah oo laga sameeyo magaalada Gaalkacyo.Dhanka kale Shacabka ku nool dhulka ismaamulka Soomaalida Ethiopia ayaa si diiran u soo dhaweeyay Madaxweynaha GalMudug iyagoo ka mahad celiyay sida walaaltinimada iyo Soomaalinimada leh ee ay ugu noolaadaan deegaanada GalMudug mararka ay u yimaadaan Daaweynta Isbitaalka Guud ee Gaalkacyo dhanka GalMudug oo sanadooyinkii u shaqeynayay u fidinayay howlo samafal ah sida Indha fiiqista uu Gacan weyn ka geysto Dr Cabdirisaaq Dalmar, Daaweynta cudurad Qaaxada uu gacan weyn ka geystaan Dr Shiikhdoon iyo Dr. Maxamed Amiin iyo Dhaqaatiir badan oo ka howl gala Isbitaalada Magaala madaxda Qaranka Muqdisho.
Dagaalo iyo duqayymo aad culus oo maalintii 8aad ka socda caasimada Soomaaliya ee Muqdisho.
Dagaalo iyo duqeymo u dhaxeeya Ciidamada Dowladda oo taageero ka helaaya kuwa AMISOM iyo Xoogaga islaamiyiinta ee ka soo horjeed ayaa maalintii 8aad waxa uu ka dhacay degmooyin ka tirsan Gobolka Banaadir.
Dagaalada ad u culus ayaa waabarigii saakay ka qarxay Degmada Boodneere halkaasoo ay isku fara saareen Ciidamada AMISOM iyo Kuwa xarakadda Alshebab,iyadoo hubka iyo madaafiicda la isku ridaayay gaartay Degano ka baxan goobaha dagaalka.
ilaa iyo iminka lama oga qasaaraha rasmiga ah ee ka dhashay dagaalkaasi ka dhacay degmadda Boondheere iyo tiradda daka ku dhintay.
Sidoo kale waxaa dagaalo goos goos ah ka dhaceen isgooyska wadada isku xirta dabka iyo Suuqa bakaaraha,waxaana qeybo ka mid ah suuqa ku dhacay Dhowr madfac sida Suuqa dahabka bakaaraha.
Tiradda dadka rayidka ah ee ku dhintay dagaalada maanta ka dhacay magaalada muqdisho ayaa lagu sheegay 6 ruux iyo dhaawaca 16 kale sida ay xaqiijiyeen sarakiisha gaadiidka Gurmadka deg'dega.
Dagaalada ka socda magaalada Muqdisho oo maalintii 8aad galay ayaa waxaa ku geeriyootay tiro ka badan 150 qof iyo dhaawaca ku dhawaad 300 oo qof.
Xarakadda Alshebab oo ka hadashay dagaalada maalinmtii 8aad ka socda magaalada muqdisho.
Xarakadda Alshebab ayaa ka hadlay dagaalada maalintii 8aad ka socda caasimadda dalka soomaaliya ee Muqdisho ka dib shir jaraa'id uu qabtay Afhayeenka xarakadda.
Sheikh C.casiis Abuu Muscab oo la hadlayaay saxaafadda muqdisho ayaa guulo ka sheegtay dagaaladii saakay ka dhacay Boondheere,isagoo tilmaamay in dagaalkaasi uu ahaa mid ay ku soo qaadeen Ciidamada AMISOM .
Afhayeenka Xarakadda ayaa xusay iney jabiyeen oo qasaare badan u geesteen Ciidamadii AMISOM ee soo weeraray waabarigii saakay isla markaana dib ugu celiyeen goobihii ay ka soo duuleen.
Afhayeenka waxa kaloo uu beeniyay sheegashada dowladda KMG iney mar kale dib ula wareegtay xaafadda Siigaalle.
Sheikh C/casiis Abuu Muscab oo saxafiyiinta kula hadlaayay Mowlaca Macalin Nuur ayaa been aan sal lahayn ku tilmaamay hadalka ka soo yeeray Afhayeenka Booliska dowladda C/laahi Xasan Bariise oo sheegay in Ciidamada dowladda ay dib ula wareegeen fasinkii ay ku lahaayeen xaafadda Siigaalle ee degmada Hodon halkasi ciidamada Xarakadda Alshebab kala wareegeen ciidamada Ahlu-sunah.
Warsaaxafadeedka maanta ka soo baxay Xafiiska Madaxweynaha dowladda KMG Soomaaliya Sheikh Sharif oo baaq loogu jeediyay Beesha caalamka.
Iyada oo maanka lagu hayo weerarkii isqarxinta ee lala eegtay Hotel Muna 24-kii August 2010, oo galaafatay nolosha dad Soomaaliyeed oo rayid ah oo gaaraya 30 qof, oo ay ku jiraan afar xildhibaan.
Madaxweynaha Dowladda Federaalka KMG Sheikh Shariif Sheikh Axmed, ayaa cusbooneysiiyay dalabkiisa ku aaddanaa in indhaha Beesha Caalamka lagu soo jeediyo arrimaha Soomaaliya, maadaama xagjirka Alshabaab ay u dhar-dhigteen ololahooda argagaxisonimo. "Sax ma aha in Soomaaliya kaligeed lagu daayo ka hortagga Alshabaab iyo Alqaacida oo jaalkood ah, maadaama Soomaaliya ay imanka uun kasoo baxayso 20 sano oo burbur, qas iyo jahawareer siyaasadeed ah." Ayuu ku yiri Madaxweyne Sheekh Shariif war murtiyeedkiisa.
Marka la eego weerarkii is-qarxinta ee July 11-keedii lala eegtay Kampala, iyo weerarkii Mogadishu ee Alshabaab iyo saaxiibadood ay abaabuleen, waxaa muuqata in argagaxisadu ay qorshaysteen in ay carqalad iyo xasilooni la’aan ku camimaan gobolka Geeska Afrika oo dhan iyo ka fogba.
"Dowladda Soomaaliya, waxa ka go’an, dib-u-yag-leelka sharciga iyo kala-dambeynta Muqdisho, iyo in ay gaashaanka u daruurto Alshabaab iyo kuwa taageera ee wata afkaaraha nidaam-diidka ee ku xiran xagjirnimada oo ay fidiniyaan, ayuu yiri Madaxweyne Shariif Sheikh Axmed. "Inkastoo ay jiraan culeysyadaas, waa inaynaan waligeen illoobin in guushu ay u baahan tahay istaraatijiyad iyo u dhabar-adayga hawsha." ayuu yiri Madaxweynuhu.
Hase yeeshee, in si dhaba looga hortago argagaxisda, dowladda waxa ay u baahan tahay kaalmada bulshada caalamka.
Sida ay qirtay dowladda Mareykan dhawaan, Alqaacidada ku sugan carriga Carabta ee ay xuddun tahay waddanka jaarka inala ah ee Yaman ayaa ka khatar badan ta ku sugan Bartamaha Pakistaan. Iyada oo ay jirto xaqiiqda ah in Pakistan, sida Afghanistan iyo Ciraaq oo la ildaran tumaatida argagaxisada, ayaa waxay helaan taageero wax ku ool ah marka laga hadlaayo dhinaca dhaqaalaha, lojistikada iyo qalabka militariba.
Dowladda Soomaaliyeed ma haysato taageero la mid ah ama u dhaw taa, mana laha ilaha dhaqaalaha dowladahaas leeyihiin oo kale. Isla markaasna, "dowladda Soomaaliyeed ayaa waxay wajahaysaa cadow la mid ah, waaba haddii uusan ka khatar badnayn." Ayuu Madaxweynuhu xusay.
Iyada oo ay jirto xaqiiqda ah in ilaha dhaqaale yaryihiin ayay ciidamada dowladda Fedraalka KM ahi ku mintideen difaacidda meelaha halbawlaha u ah dowladda, kana go’antahay inay jabiyaan Alshabaab. "Maadaama kooxa nabad-diidka ahi ay wadaan khatar isaga gudbaysa xuduudaha ayay dowladda Soomaaliya mar kale ku celinaysaa dalabka ah in lala soo gaaro taageero caalami ah" ayuu yiri Madaxweynaha.
Ciidamada Ethiopia oo dhaqdhaqaaq ciidan ka wada Xuduuda Gobolka Hiiraan.
Ciidamada Ethiopia ee ku sugan Xuduuda gobolka hiiraan ayaa la sheegay in ay dhaqdhaqaaq ciidan malintii 3aad ay ka wadaan halkaasi.
Ciidamo Ethiopian oo ku hubaysan gaadiidka dagaalka ayaa 3dii cisho ee la soo dhaafay yimid degaanka kala Beerka oo 25km dhinaca koofur kaga beegan Magaalada B/weyne ee xarunta Gobolka Hiiraan.
Dadka degaanka ayaa sheegay in ciidamada Ethiopia ay yimadeen kala Beerka dibna uga laabteen mudo sedex jeer ah, iyadoo aan la ogayn sababtay keentay iney ka soo talabaan xuduuda iyadoo wararka qaar ay sheegayaan in Ciidamada Ethiopia ee ka soo talabay xadka ay wehliyeen ciidamo ka tirsan maamulkii laga Eryay Gobolka ee Dowlada KMG.
Dhawaan ayaa wasiir ka tirsan Dowladda Ethiopia sheegay in Ethiopia qorshaha ugu jirin iney ciidamo u soo dirto dalka soomaaliya, balse ay jiran Howlgalo Ciidamada Ethiopia ay ku sugayaan amaanka xuduuda ay la wadaagto Soomaaliya.
Golaha wasiiradda Dowladda KMG oo meelmariyay Xeerka Ciqaabta Burcadbadeedka ka dib kulan ay maanta ku yeesheen Muqdisho.
Golaha wasiiradda Dowladda KMG ee soomaaliya ayaa maanta magaalada muqdisho ku yeeshay kulan looga hadlaayay Xeerka Ciqaabta Burcad badeedka soomaalida iyo Hoy loo sameeyo Xildhibaanadda Dowlada KMG ka dib weerarkii Hotel MUNA.
la Taliyaha raii'sulwasaaraha dhinaca saxaafadda Cabdi xaaji Goobdoon oo saxaafadda la hadlayay ka dib shirka golaha wasiiradda ayaa sheegay in golaha wasiiradda meel mariyeen laboqodob oo kala ah Xeerka Ciqaabta Burcadbadeedka iyo Hoy (Guri) loo sameeyo xildhibaanadda baarlamanka soomaaliya ka dib weerarkii dhawan lagu dilay 4 ka tirsan Xildhibaanadda Dowladda KMG .
Shirka golaha Wasiiradda uu shir gudoominaayay ra'iisulwasaare Sharmaarke waxaa warbixin looga dhageeystay qaar ka tirsan wasiirada dowladda KMG oo aan shaqaynin wasaaradahooda .
