Gudoomiyaha Balanballe " Ciidanka Itoobiya ee Balanaballe jooga waxay noo sheegeen in ay dowladu ka warqabto joogitaankooda"!

 

MudugNet, Muqdisho. Talaado, June 23, 2009.
 

Maamulka degmada Ballanballe gobalka Galgaduud ayaa shaaca ka qaaday in Dowladda Federaalka Somalia ay ka warqabto joogitaanka Ciidanka Itoobiya ee mudadad 25-maalmood ah sida xoogga ah ku haysto Galgaduud.
Gudoomiyaha degmada Balanballe Hareeri Xasan barre ayaa shaaca ka qaaday in Ciidanka Itoobiya ay u sheegeen in ay Balanbale ku joogeen amarka dowlada islamarkaana ay dhawaan aadi doonaan degmooyinka gobalka Galgaduud.

Wuxuu sheegay in kadib kulan ay la qaateen saraakiisha hogaaminaysay ciidanka Ethiopia ee ku sugan degmada Balanballe ay ugu sheegeen in dowladda KMG ah ay ka war qabto joogitaanka ciidanka Ethiopia ee halkaas, waxaana uu sheegay in saraakiisha ciidanka Ethiopia ay u sheegeen inay maalmaha soo socda u dhaqaaqi doonaan degmooyin katirsan gobolka Galgaduud.

Wuxuu xusay in ciidanka Ethiopian-ka ee ku sugan degmada Balanballe ay isi soo xoojiyeen islamarkaana ay u eg yihiin kuwa safar ugu ambabaxaya degmooyinka kale ee gobolka Galgaduud, waxaana uu sii raaciyey hadalkiisa in wixii ka dambeeyey imaatinka ciidanka Ethiopia uu yaraaday dhaqdhaqaaqii ganacsiga.



Mudugnet.com Xafiiska Wararka Magaalada Muqdisho