Al Shabaab oo Suuqa Xoolaha ka mamnuucday Cunista Maandooriyaha Khaadka

 

MudugNet, Muqdisho. Arbaco, July 01, 2009.
 

Xoogaga hubaysan ee maamula degmada huriwaa magaalada Muqdisho ayaa deeganaasi kusoo rogay Awaamir ay ku diidayaan cunista khaadka iyo ka ganacsigiisa.
Baabuur dagaal oo ay ku rakibanyihiin sameecado ayaa dhaxwareegayay suuqa Xoolaha kuwaasi oo dadka uga digayay arrimaha qaadka.

Dadka ka ganacsada khaatka ayaa lagu amray inaysan hadda kadib deegaanka keeni karin khaatka islamarkaana ciddii spoo galisa laga qaadi doono talaabo sharciga islaamka waafaqsan, waxaana sidoo kale digniin loo jeediyey dadka isticmaalka oo looga digay inay deegaanka suuqa xoolaha ku cunaan khaatka.
Dadka ku dhaqan deegaanka Suuqa Xoolaha oo xiliyadii ugu dambeeyey si weyn u camir mayey ayaa si weyn maanta u hadal haya joojinta ka ganacsiga iyi isticmaalka khaatka ee deegaanka suuqa xoolaha degmada Hurwaa magaalada Muqdisho.

Xoogagga Al-shabaab ayaa horay deegaano dhowr ah oo ay gacanta ku hayaan waxa ay gebi ahaanba uga joojiyeen isticmaalka iyo ganacsiga khaatka taas oo dadka badankiisa ay si wen u soo dhaweeyeen.

Mudugnet.com Xafiiska Wararka Magaalada Muqdisho